പിൻവിളി

സീൻ-1

രാവിലെ.
വീട് (സോപാനം).
പുറത്തു നിന്നുള്ള ദൃശ്യം.

പുറത്തു സ്കൂൾ ബസ്സ്  ഹോണടിക്കുന്ന ശബ്ദം.
ജനൽക്കമ്പിയിൽ പിടിച്ചു പുറത്തേക്കു നോക്കി അസ്വസ്ഥയാവുന്ന  ശ്രീമോൾ.
മൂന്നാം ക്ലാസ്സുകാരി, പക്ഷെ പുഷ്ടിയുള്ള ശരീരം.


സീൻ-2

രാവിലെ.
സോപാനത്തിനകവശം .
കസേര തള്ളിക്കൊണ്ടു  വാതിനു സമീപം കൊണ്ടു വന്നു അതിൽ കയറി വാതിലിന്റെ
സാക്ഷ തുറന്നു നോക്കുമ്പോൾ ദൂരെ ഗേറ്റിനു മുൻപിൽ നിന്നു ഹോണടിച്ചു ഹോണടിച്ചു കടന്നു പോകുന്ന സ്കൂൾ ബസ്സ്.
സങ്കടപ്പെട്ടു കരയുന്ന ശ്രീമോൾ.


സീൻ-3

രാവിലെ.
സോപാനത്തിനകവശം .

ടെലഫോൺ അടിക്കുന്ന ശബ്ദം.

കസേരയിലിരുന്നു തേങ്ങിക്കരയുന്ന ശ്രീമോൾ ഓടി വന്നു ഫോൺ എടുക്കുന്നു.

ഹലോ !
(കണ്ണീരു തുടച്ചു ആഹ്ലാദത്തുള്ളിച്ചയോടെ...!)
മമ്മിയല്ലേ?
( അപ്പുറത്തു നിന്നുള്ള ഒച്ച കേൾക്കാൻ കാതോർക്കുന്ന ഗ്യാപ്പ്)

മമ്മീ എന്താ ഒന്നും മിണ്ടാത്തതു മമ്മീ...!

(ഒന്നും കേൾക്കാതിരുന്നപ്പോൾ വീണ്ടും സങ്കടത്തോടെ....)

എന്തേ മമ്മീ....! ഇന്നലെ രാത്രി വരാതിരുന്നത്.
ഇന്നെലെ മുഴുവൻ ഞങ്ങൾ  വാതിലിനടുത്തു തന്നെ കിടന്നാണു ഉറങ്ങിയത്.

(മറുപടി ഒന്നും കിട്ടാതെ കൂടുതൽ സങ്കടത്തോടെ....)


മമ്മി എന്തേ ഇന്നലെ വിളിക്കാതിരുന്നത്.

വാവ എപ്പോഴും കരച്ചിലാണു മമ്മീ..

(പശ്ചാതലത്തിൽ വാവയുടെ കരച്ചിൽ. )

അവന്റെ പാൽ‌പ്പൊടി ഞാൻ കലക്കിക്കൊടുത്തപ്പോൾ അതു ശരിക്കും കലങ്ങിയില്ല മമ്മീ..
തൊണ്ടയിൽ കുടുങ്ങി, അവനു ശ്വാസം കിട്ടാതെയായി..
ഞാൻ വല്ലാതെ പേടിച്ചു മമ്മീ...!

പാൽ അല്ലാതെ അവനു പിന്നെ എന്താണു കൊടുക്കുക മമ്മീ..
ഇന്നലെ അവൻ വിശന്നു കരഞ്ഞപ്ലോൾ ഞാൻ ഫ്രിഡ്ജിൽ തെരെഞ്ഞു ഒരു വാഴപ്പഴം കിട്ടി. അതു അലിയിച്ചു കൊടുത്തു കിടത്തി.
ഇന്നു ഒന്നും ഇല്ല മമ്മീ... അവൻ വിശന്നു വല്ലാതെ കരയുന്നു.

ഇന്നും സ്കൂൾ ബസ്സ് പടിക്കൽ വന്നു കുറേ നേരം ഹോണടിച്ചു മടങ്ങിപ്പോയി.
ഞാൻ ഹോം വർക്ക് ഒന്നും ചെയ്തിട്ടില്ല മമ്മീ...
നാളെ ചെല്ലുമ്പോൾ മിസ്സിനോടു എന്താ പറയാ...
എന്തു പറഞ്ഞാലും മിസ്സ് അടിക്കും.

പിന്നെ മമ്മീ....
ഇന്നലെ രാത്രി ഞങ്ങൾ വല്ലാതെ പേടിച്ചു മമ്മീ...
വാതിലൊന്നും മുകളിലെ കുറ്റിയിടാൻ എത്തിയില്ല,

കള്ളന്മാർ വരുമെന്നു കരുതി അലമാരി പൂട്ടാൻ താക്കോലു നോക്കിയപ്പോഴാണു കണ്ടത്, മമ്മിയുടെ ആഭരണങ്ങളും പപ്പ മമ്മിക്കു തന്ന ആ പേഴ്സും അതിലില്ല.
അതിലെ പപ്പായുടെ ഫോട്ടോ മാത്രം താഴെ കീറിക്കിടപ്പുണ്ട്. വാവയുടെ കാലിലെ സ്വർണ്ണത്തണ്ടയും എന്റെ കമ്മലും കഴുത്തിലിട്ടിരുന്ന ചെറിയ ചെയിനും ഒന്നും അലമാരിയിൽ കാണുന്നില്ല.


ലൈറ്റ് ഓഫാക്കാതെയാണു ഞങ്ങൾ ഉറങ്ങിയത്.

( അപ്പുറത്തു നിന്നും ഒരു ഗദ്ഗദം മാത്രം ശ്രീമോൾ കേൾക്കുന്നുണ്ട്...)

മമ്മി ഇപ്പോൾ ആ അങ്കിളിന്റെ കൂടെയാണോ? ആ അങ്കിൾ ചീത്തയാ മമ്മീ.. എപ്പോഴും എന്റെ ചന്തിക്കു പിച്ചുമായിരുന്നു.
മമ്മി എപ്പോഴാ വരിക? ?  ഇന്നു ഞാനും വാവയും ഒന്നും കഴിച്ചിട്ടില്ല മമ്മീ. പപ്പ വിളിക്കുമ്പോൾ മമ്മി  എങ്ങോട്ടു പോയി എന്നാണു പറയേണ്ടത്?



പപ്പ പാവമാണു മമ്മീ..
പപ്പ ഇനി വഴക്കു പറയില്ല. മമ്മി വേഗം വരണം. എനിക്കു സങ്കടം വരുന്നുണ്ട്.  വാവയുടെ കരച്ചിലു മമ്മി കേക്കിണില്ലേ?
എന്തെങ്കിലും പറയൂ മമ്മീ...!


(ഫോണിന്റെ സ്പീക്കറും ഭേദിച്ചു പുറത്തേക്കു അണപൊട്ടിയൊഴുകുന്ന ഒരു അമ്മക്കരച്ചിൽ നമുക്കു  കേൾക്കാം.)

മമ്മി കരയുകയാണോ?
കരയേണ്ട മമ്മീ...


-------  ഇടവേള ---------




77854